今次返嚟意大利除咗睇奶奶、睇外甥女同睇姑拉幫我班返嚟嘅晚郵報外，仲有一大任務，就係帶住我家兩寶慢遊意大利☺️
短短十零日，每日朝8晚12，堅係攰嗱過返工。
記得我初中時，我哋幾姊弟嘅米飯班主帶我哋一家啦去旅行威威🤭。斬眼兩個十年，依家終於盡吓阿女之孝，請兩位屋企揸fit人去意大利慢遊😬
我哋主要喺意大利南部玩，意佬呢個女婿實走唔甩要做柴可夫~嘻嘻~我呢就做咗貼身翻譯員咁樣…
旅程未去到一半，我已發現我呢幾日最常問嘅係：「老豆去咗邊？」「佢哋係咪出咗嚟喇？」去到Capri租噗噗綿羊仔🏍又成日叫停意佬：「老豆跟唔跟到我哋車尾嫁？開慢啲啦！」
人哋話湊仔時一定要將個B擺喺自己視線範圍之內先算安全，有時我都質疑自己當兩老低B咁，下下啄到實驚屎佢哋蕩失路🙈
或者呢個就係人性的特點、良知的行為。
無論嗰個係屋企揸fit人定揸𨋢人，你都一定想佢喺你面前齊齊整整，平平安安。
或許每年見面嘅日子少得手指腳趾加埋都數得哂，就算唔係要兩寶上刀山落油獲，既然係喺我視線範圍內，我意志話我知無時無刻都要好好守護佢哋。
或許年少時總覺得自己係被照顧嗰個所以不以為意，幾經年輪到現在，當父母需要你去照顧時，先發現皺紋原來已靜雞雞爬到佢哋臉上。
希望我呢次扮孝順女，扮得及時。
呢幾日經常都親親阿媽，攬攬老豆，希望這世上最親最真的擁抱，抱得及時。
老豆行得慢了，媽子睇電話都開始模糊了，希望做仔女的，愛得及時。
#守護
#愛得及時
#爸爸媽媽陪我放暑假
Search